سمعني نقولك آ الغزال
قلبي ما يتشرى بالمال
المحبة ما عند ربي
ومحال نبيع لك قلبي محال
عايش فقير ومايهمنيش
وديما غني في قلبي
ما عنديش وما خصنيش
والرزاق هو سيدي ربي
يا الحمامة اللي بيا تتغزل
يا مولة الصوت الحنين
يا اللي فالصبحية تهدل
ومعرفت صوتك منين
علاش اللي عطاه ربي يتبدل
وينسى أصلو فالحين
علاش اللي رزقو ربي يتبهدل
وما يكون لخوه عوين..
يا اللي عندك المال
وفكل يوم تعدو
رد من الدنيا البال
وبابك ع المحروم لا تسدو
انظر بعطفك م الحال
وخلي الحساد يحسدو
انفق مالك فالحلال
والمولى يزيدك معندو
راه ما يدوم ل دنيا حال
واللي اعمل الخير يوجدو
Aucun commentaire:
Enregistrer un commentaire